Kalyani Gilbile – Mumai Uncensored, 1st June 2022
सोमवारी, ३० मे रोजी पंतप्रधान नरेंद्र मोदी यांनी व्हिडिओ कॉन्फरन्सिंगद्वारे मुलांसाठी पीएम केअर योजनेअंतर्गत लाभ जाहीर केले. पंतप्रधान नरेंद्र मोदी यांनी २९ मे २०२१ रोजी कोविड-१९ मुळे ज्या मुलांनी त्यांचे पालक किंवा कायदेशीर पालक किंवा दत्तक पालक गमावले, अशा मुलांना आधार देण्यासाठी PM CARES योजना सुरू केली होती.
कार्यक्रमादरम्यान संबोधित करताना पीएम मोदी म्हणतात, “मी मुलांशी पंतप्रधान म्हणून नाही तर तुमच्या कुटुंबातील सदस्य म्हणून बोलत आहे. आज मुलांमध्ये राहून मला खूप समाधान वाटत आहे. ‘पीएम केअर फॉर चिल्ड्रन’ हे प्रत्येक देशवासी अत्यंत संवेदनशीलतेने तुमच्यासोबत असल्याचे प्रतिबिंब आहे.'”
कार्यक्रमादरम्यान, पंतप्रधानांनी शाळेत जाणाऱ्या मुलांना शिष्यवृत्ती दिली. ज्यांनी कोरोनाव्हायरस साथीच्या आजारात त्यांचे आईवडील किंवा पालक गमावले आहेत त्या मुलांना मोदींनी पीएम केअर्स फॉर चिल्ड्रनचे पासबुक तसेच ‘आयुष्मान भारत – प्रधानमंत्री जन आरोग्य योजना’ अंतर्गत आरोग्य कार्डही दिले. तसेच या योजनेअंतर्गत एखाद्याला व्यावसायिक अभ्यासक्रम किंवा उच्च शिक्षणासाठी शैक्षणिक कर्जाची आवश्यकता असल्यास, PM-CARES त्यांना मदत करण्यास सक्षम असेल. या मुलांना त्यांच्या दैनंदिन गरजा भागवता याव्यात यासाठी त्यांना दरमहा ४००० रुपये मिळणार असल्याचे त्यांनी सांगितले. आणि जेव्हा अशी मुले शालेय शिक्षण पूर्ण करतात तेव्हा त्यांना भविष्यातील गरजांसाठी अधिक पैसे लागतील. हे लक्षात घेऊन ही योजना १८ ते २३ वर्षे वयोगटातील तरुणांना दरमहा स्टायपेंड देईल आणि २३ वर्षांचे झाल्यावर त्यांना १० लाख रुपये मिळतील, अशी घोषणा मोदींनी केली. “लहान मुलांना ‘पीएम केअर्स फॉर चिल्ड्रन’ द्वारे आयुष्मान हेल्थ कार्ड देखील दिले जातील, तसेच यातून ५ लाख रुपयांपर्यंतच्या उपचारांची मोफत सुविधा देखील उपलब्ध करून देण्यात येईल” असेही पीएम मोदी पुढे म्हणाले.
कार्यक्रमादरम्यान पंतप्रधान म्हणाले, “मला माहित आहे की ज्यांनी कोविड-१९ साथीच्या आजारात कुटुंबातील सदस्य गमावले आहेत त्यांच्यासाठी ही परिस्थिती किती कठीण आहे. हा कार्यक्रम अशा मुलांसाठी आहे ज्यांनी महामारीच्या काळात आपले पालक गमावले आहेत. पीएम केअर फॉर चिल्ड्रन ही योजना अशा मुलांसाठी एक प्रयत्न आहे,” तसेच ते पुढे म्हणाले की, “कोणताही प्रयत्न/समर्थन तुमच्या पालकांच्या प्रेमाची जागा घेऊ शकत नाही. त्यांच्या अनुपस्थितीत ‘माँ भारती’ तुमच्यासोबत आहे. भारत PM Cares च्या माध्यमातून याची पूर्तता करत आहे. हा केवळ एक व्यक्ती, संस्था किंवा सरकारचा प्रयत्न नाही. पीएम केअर्स मध्ये लोकांनी कष्टाने कमावलेला पैसा जोडला आहे,”
“पीएम केअर्स फंडाने महामारीच्या काळात रुग्णालये तयार करणे, व्हेंटिलेटर खरेदी करणे आणि ऑक्सिजन संयंत्रे उभारण्यात खूप मदत केली. त्यामुळे अनेकांचे प्राण वाचू शकले. पण जे आपल्याला अवेळी सोडून गेले, आज हा निधी त्यांच्या मुलांसाठी, तुमच्या सर्वांच्या भविष्यासाठी वापरला जात आहे,” असेही मोदी पुढे म्हणाले.
पंतप्रधान कार्यालयाने दिलेल्या माहितीनुसार, या योजनेचे प्राथमिक उद्दिष्ट मुलांना राहण्याची व्यवस्था करून त्यांना दीर्घकालीन काळजी आणि संरक्षण प्रदान करणे, तसेच ते २३ वर्षांचे झाल्यावर १० लाखांचे समर्थन, आणि आरोग्य विम्याद्वारे त्यांचे आरोग्य सुनिश्चित करणे. त्यांना शिक्षण आणि शिष्यवृत्तीच्या माध्यमातून सक्षम करणे आणि त्यांना आर्थिकदृष्ट्या स्वयंपूर्ण करण्यासाठी सुसज्ज करणे हा आहे.
विशेष म्हणजे, केंद्र सरकारने मुलांसाठी ऑनलाइन नोंदणीचे प्रवेशद्वारही विकसित केले आहे. पोर्टल ही एकल-खिडकी प्रणाली आहे जी मुलांसाठी मान्यता प्रक्रिया आणि इतर सर्व सहाय्य सुलभ करत आहे.
